భక్తి సాగరంలో జ్ఞాన తరంగాలుంటాయని కొందరు, జ్ఞాన సాగరంలో భక్తి తరంగాలు ఉంటాయని కొందరు విజ్ఞులంటారు. నదీనాం సాగరోగతి: నదికి సాగరమే గతి , సముద్రంలో కలిసిపోయిన నదికి నామరూపాలుండవు, అలాగే భగవంతునిలో సర్వాత్మనా కలిసిపోయిన భక్తునికి నామరూపాలుండవు. అట్టి స్థితిని అందుకొన్న జ్ఞాని, భక్తురాలు అవధూత వేంకటాంబ. చదువు సంధ్యలు, అభిజాత్యము, గురూపదేశము పూర్వజన్మలోనే కాబోలు.
ఈ జన్మలో మాత్రం మట్టిలో మాణిక్యం వేంకటాంబ. మురికి గుంటలో బురదనీటి స్నానము, మాదిగ లంబ (గల్ల తొట్టి) నీరు పానము, నారాయణ స్మరణము, శాంభవీ ముద్రలో బ్రహ్మానుసంధానము, అప్పుడప్పుడు గృహస్థులిండ్లల్లో భిక్షకై ఒక చేతిలో మట్టి మూకుడు, మరొక చేతిలో దండము, మాసిపోని మేనిఛాయ, సూర్యుని కాంతి, చంద్రుని చలువ ఒక్కటైన కన్నులుగల తల్లి అవధూత వేంకటాంబ.
వేంకటాంబను గొప్ప అవధూతగా గుర్తించిన వారు స్వామి నిఖిలనాధుల వారు. ఆయనచే వేంకటాంబ వారి దగ్గరకు పంపబడిన శిష్యులు వటుకనాధుడు. అమ్మ ఆయనకు పెట్టిన పేరు కృష్ణమాచార్యులు. గురువుల ఆదేశం మేరకు వటుకనాధుల వారు 1994 నుంచి వేంకటాంబ తల్లికి చేసిన కఠోర సేవ అసాధారణం మరియు వెలకట్టలేనిది.
అసాధారణ భగవన్నామస్మరణచే ముక్తికి చేరువైన వేంకటాంబ వారు, వారి భక్తులకు యోగ్యతను బట్టి కొందరికి మంత్రోపదేశము, కొందరికి హితము, కొందరికి సూర్య నమస్కారములు, వినాయక పూజ, శివాభిషేకం, అన్నదానం, నామస్మరణ, భజన బోధించినది. అమ్మ మహిమలు అనేకం (పూర్తి వివరాల కోసం క్లుప్తంగా ప్రచురించబడిన అమ్మ జీవిత చరిత్రను డౌన్లోడ్ చేసుకొనగలరు). తను శరీరాన్ని చాలించే తేదీ/ సమయాన్ని ముందుగానే శిష్యునికి చెప్పి నవంబరు 4, 2000 నాడు వేంకటాంబవారు భగవంతునిలో ఐక్యమయ్యారు.
శ్రీ వేంకటాంబవారి సమాధి, ఆశ్రమము కఱబల్లవోలులో నిర్మించబడినది. శిష్యులు వటుకనాధుల వారు భిక్షాటనకై కొన్ని వందల గ్రామాలు తిరిగి, దానితో సేకరించిన ధనంతో ఆశ్రమాన్ని నిర్మించడం జరిగినది. వటుకనాధుల వారిచే అమ్మ వారి పూజ విధానము, అనేక పుస్తకములు, నామ స్మరణ శ్లోకము, అష్టోత్తరం, సహస్రనామము, కర్పూర హారతి, సుప్రభాతసేవ, నిత్యపూజ, ఏకాంతసేవ.. అనేకం లిఖించబడినవి. నిత్యము ఆయనచే మరియు భక్తులచేత నిత్యపూజలు జరుగుతున్నవి.
శ్రీ వేంకటాంబవారి ఆశ్రమ అభివృద్ధి మరియు గుడి కార్యక్రమాలు, భక్తులు మరియు కఱబల్లవోలు గ్రామస్థులచే నిర్ధారించిన, నిర్మించబడిన కమిటీ చేత జరపబడుతున్నవి. అమ్మవారి ఆశ్రమ అభివృద్ధి సాధనకు విరాళాలు ఇస్తున్న భక్తులు అనేకం. అమ్మవారి ఆశ్రమములో పెళ్లిళ్లు, ఆరాధన, అన్నదాన, పుట్టు వెంట్రుకలు తీయడం వంటి కార్యక్రమాలు జరుగుతుంటాయి.
